ဘုရားရှင် ဟောကြားခဲ့သည်မှာ အရှက်အကြောက်တရားသည် လူသားတို့အတွက် အစောင့်အကြပ်တရားများပင် ဖြစ်လေသည်။ ဘုရားရှင်ဟောကြားခဲ့သော လူတိုင်းထားသင့်သော အရှက်အကြောက်တရားဆိုသည်မှာ မကောင်းတာ လုပ်ရမှာ၊ မဟုတ်တာမမှန်တာကို လုပ်ရမှာကို ရှက်ခြင်းနဲ့ကြောက်ခြင်း ဒီတရားနှစ်မျိုးပင် ဖြစ်လေသည်။
ဒါပေမယ့် ပညာမဲ့သောသူတို့သည် ရှက်သင့်ကြောက်သင့်သည်ကို မရှက်မကြောက်ကြဘဲ မရှက်သင့်သည် မကြောက်သင့်သည်တို့ကို မိုက်မဲစွာ ရှက်ကြောက်နေကြသောအခါ လောကသည် ရုပ်ဆိုးအကျည်းတန်လာတတ်ပါသည်။
တခါတရံ ထိုမိုက်မဲသော အရှက်အကြောက်တရားသည် ပညာမဲ့သောသူတို့ကို ဖုံးလွှမ်းတတ်လေသည်။ ထိုမိုက်မဲသော အရှက်အကြောက်တရား ဖုံးလွှမ်းခြင်းခံရသော လူတယောက် အဖွဲ့အစည်း တခု၊ တိုင်းပြည်တခုသည် ဘယ်တော့မှ မအေးချမ်းနိုင်သလို ဘယ်တော့မှလည်း တိုးတက်သာယာနိုင်မည် မဟုတ်ပေ။
ထိုမိုက်မဲသော အကြောက်တရားကြီးစိုးလာတဲ့အခါ လူတွေဟာ ကိုယ်ကျင့်တရားကို မစောင့်ထိမ်းနိုင်ကြတော့ဘူး။ ပြီးတော့ အမှန်တရားဆိုတာကိုလည်း မပြောရဲ မလုပ်ရဲကြတော့ပေ။
ထိုမိုက်မဲသော အကြောက်တရားတို့မှာ
(၁) အမှန်တရား အတွက် မိမိကို ထောင်ချမှာကို ကြောက်ခြင်း
(၂) အမှန်တရား အတွက် မိမိကို ဖမ်းမှာ ကြောက်ခြင်း
(၃) အမှန်တရား အတွက် မိမိကို သတ်မှာ ကြောက်ခြင်း
(၄) အမှန်တရား အတွက် မိမိ မိသားစုကို ဒုက္ခပေးမှာ ကြောက်ခြင်း
(၅) အမှန်တရား အတွက် မိမိ ရာထူးပြုတ်မှာ ကြောက်ခြင်း
(၆) အမှန်တရား အတွက် မိမိစည်းစိမ်တွေ ယုတ်လျော့သွားမှာ ကြောက်ခြင်း
(၇) အမှန်တရား အတွက် မိမိ အချောင်ရနေတဲ့ အခွင့်အရေးတွေ ဆုံးရှုံးမှာ ကြောက်ခြင်း
(၈) အမှန်တရား အတွက် မိမိရရှိနေတဲ့ အာဏာဆုံးရှုံးမှာ ကြောက်ခြင်း
စသည်ဖြင့် မိုက်မဲသော အကြောက်တရား များစွာရှိလေသည်။
မိုက်မဲသောအကြောက်တရား လွှမ်းမိုးခံရသူတို့သည် မဟုတ်မမှန်တာတွေလုပ်ဖို့ ၀န်မလေးကြတော့ပေ။ထိုကြောက်စိတ် ကြောင့်ပင် အမှားတွေကျူးလွန်ရင်း မှားပြီးရင်းမှားက အမှားသံသရာတွင် ပိတ်မိကြကာ အသိတရားကိုယ်ကျင့်တရားတို့ ကင်းမဲ့လာကြလေသည်။ ထို့ကြောင့်ပင် ကမ္ဘာကျော် အာဏာရှင်ကြီးတို့သည် ထိုမိုက်မဲသော အကြောက်တရား အသုံးချခဲ့ကြလေသည်။
ထို့ကြောင့် မိုက်မဲသော အကြောက်တရားသည် အလွန် ကြောက်စရာ ကောင်းလှပါသည်။
ထိုမိုက်မဲသော အကြောက်တရားသည် လောကကို ဖျက်စီးတတ်သော တရားပင်ဖြစ်လေသည်။
လူ့ဘ၀သည် တိုးတောင်းလွန်းပါသည်။ ထိုတိုတောင်းလွန်းလှသော ဘ၀တိုတိုလေးတွင် ကျနော်တို့၏ ကံတရားသည် ကျနော်တို့နောက် အရိပ်ပမာ ထပ်ကြပ်မကွာ လိုက်ပါလာနေပါသည်။ ကျနော်တို့ ပြုလိုက်သော ကံတရား၏ ကောင်းမှုဆိုးမှုကို ယ္ခုဘ၀မှာပဲဖြစ်စေ၊ နောင်တမလွန်ဘ၀မှာပဲ ဖြစ်စေ သံသရာမဆုံးသရွေ့ ပြန်လည်ခံစားကြရမည်ဖြစ်သည်။
တနေ့နေ့မှာ သူဌေးပဲဖြစ်ဖြစ် ဆင်းရဲသားပဲဖြစ်ဖြစ်၊ ရာထူးရှိသူပဲဖြစ်ဖြစ် ရာထူးမဲ့သူပဲဖြစ်ဖြစ် ကျနော်တို့ အားလုံးဟာ ပိုင်ဆိုင်ခဲ့သမျှ တက်မက်တွယ်တာခဲ့သမျှတွေကို ထားခဲ့ကြရမည် ဖြစ်သည်။ ကျနော်တို့နှင့်အတူ ယူဆောင်သွားနိုင်သည်မှာ ကျနော်တို့ ပြုခဲ့သော ကောင်းမှုဆိုးမှု ကံတရားများပင် ဖြစ်လေသည်။
ပြုသူအသစ် ဖြစ်သူအဟောင်းဆိုသလို အတိတ်က လုပ်ခဲ့တဲ့ ဆိုးကျိုးများကြောင့် ဖြစ်သူအဟောင်းဆိုပြီး ဒုက္ခတွေ ခံစားနေရပေသည်။ မကောင်းမှု မပြုရသေးခင် ပြုသူအသစ်ဖြစ်ပြီး သံသရာကျွေးတို့ ထပ်မံ မသယ်ဆောင်သွားသင့်တော့ပေ။
တိုတောင်းတဲ့ လူ့ဘ၀လေးမှာ နေခွင့်ရစဉ်မှာ အများအကျိုး လောကအကျိုးပြုနိုင်တဲ့ လူသားတယောက်အဖြစ် မိမိဘ၀ မိမိသံသရာအတွက် အကောင်းဆုံး ပိုင်ဆိုင်မှုကို ရယူနိုင်ဖို့ ကြိုးစားသင့်ပေသည်။
ကျနော်တို့သည် မိုက်မဲသော အကြောက်တရားမှ လွတ်မြောက်အောင် ကြိုးစားမရမည် ဖြစ်သည်။
မြင့်မြတ်သော အရှက်အကြောက်တရားများဖြင့် လောကအတွက် မကောင်းတာ၊ မဟုတ်တာမမှန်တာတွေ လုပ်ရမှာကို ရှက်ကြောက်ပြီး ကိုယ့်ပတ်ဝန်းကျင်၊ ကိုယ့်မြို့ကိုယ့်ရွာ၊ ကိုယ့်နိုင်ငံ ကိုယ့်ကမ္ဘာ ၊ ကိုယ့်လောကကို ကောင်းကျိုးပြုနိုင်ဖို့ ကြိုးစားရပါလိမ့်သည်။
လူတိုင်း မိုက်မဲသော အရှက်အကြောက်တရားတို့မှ ကင်းဝေးပြီး မြင့်မြတ်သော အရှက်အကြောက်တရားများကို ထိမ်းသိမ်းကာ သံသရာခရီးသွားကောင်းများ ဖြစ်ကြပါစေ။
လင်းဝေ
No comments:
Post a Comment