တခဏတာ
အသုံးတော်ခံနေကြတဲ့
ဟောဒီ
လောကဇာတ်ခုံပေါ်
တချို့တွေက
လမ်းချင်းမတူလို့
လူချင်းကွဲပြီး
တချို့တွေက
လမ်းချင်းတူလို့
လူချင်းတွေ့ကြ
အတုယောင်တွေ များလွန်းလှတဲ့
လူ့လောကမှာ
အစစ်မှန်တွေတွေ့ရှိလို့
ဆန္ဒတွေ အမြန်ပြည့်ဝကြပါစေ
လောကရဲ့သဘာဝမို့
အရောင်တွေက အမျိုးမျိုး
ဘယ်သူတွေ ဘယ်လိုအရောင်ရှိနေပါစေ
ကိုယ့်ရဲ့ဖြူစင်မှုကလေးကို
အပျက်ခံဖို့မလိုပါဘူး
မိုးခါးရေဆိုတာ
ချိုမြိန်မှုအစစ်အမှန်မှ
မဟုတ်ဘဲလေ
လူတွေက
ကိုယ့်သမိုင်းကိုယ် ရေးနေကြတာပါ
တချို့တွေက
အင်အားကြီးမှ မှန်တယ်ထင်
တချို့တွေက
ဂုဏ်ရှိမှ လူရာဝင်တယ်ထင်ကြ
ဘာပဲဖြစ်ဖြစ်ပေါ့လေ
ဘဝဆိုတဲ့ ခဏငယ်လေးမှာ
ကျနော်တို့ဟာ
ကိုယ့်ဘဝကိုယ်
ရိုးသား ကြိုးစား စေတနာထားပြီး
အောင်မြင်အောင်ကြိုးရမှာပေါ့လေ
လင်းဝေ
