အပိုင်း (၆) မှ အဆက်
ကျမမိဘများသည် ချမ်းသာကြွယ်ဝသော ဆီစက်၊ဆန်စက်ပိုင်ရှင်များ ဖြစ်ကြသည်။
အလွန်စည်းကမ်းတင်းကြပ်သော၊အစဉ်အလာကြီးသော အသိုင်းအ၀ိုင်းလည်း ဖြစ်သည်။
အိမ်ထောင်ပြုရာတွင်လည်း မိဘများစီစဉ်ပေးသည့်သူကို လက်ထပ်ရသည့် ရှေးရိုးစွဲအစဉ်အလာ
တစ်ခုလည်း ရှိသည်။ယခုလည်း ဆရာဝန်တစ်ယောက်နဲ့ လက်ထပ်ဖို့ စီစဉ်ထားပြီးဖြစ်ပါသည်။
ကျမကတော့ အချစ်မပါသော နှလုံးသားမဲ့ အိမ်ထောင်တစ်ခုမှာ ဘ၀ကိုမနှစ်မြုပ်ချင်ပါ။
သို့သော် အချစ်ဆိုသော အရာကိုလည်း အဲဒီတုန်းက နားမလည်ခဲ့သေးပေ။မေမေ့စကားကို
မလွန်ဆန်နိုင်၍သာ ခေါင်းငြိမ့်ခဲ့ရခြင်း ဖြစ်ပါသည်။အဲဒီအတွက် မေမေကလည်း ကျမရဲ့ တောင်းဆိုချက်တစ်ခုကိုလိုက်လျောပေးခဲ့ပါသည်။အဲဒါကတော့ အိမ်ထောင်မပြုခင် ကျောင်းကို လွတ်လပ်စွာ တက်ခွင့်ပဲ ဖြစ်ပါသည်။
မန္တလေးတက္ကသိုလ်မှာဆို ထိုဆရာဝန်ဆိုသော ပုဂ္ဂုလ်ကိုမမတွေ့ချင်ဘဲ တွေ့နေရသည်။ကျမထိုလူကို ဘယ်လိုမှ ကြည့်လို့မရ၊မေတ္တာလည်း ထားလို့မရပါ။ထို့ကြောင့် သူနဲ့မတွေ့အောင် အမြဲရှောင်နေရသည်။ သို့သော် ထိုလူကလည်း မျက်နှာပြောင်တိုက်ကာ လာမြဲလာနေသည်။ထို့ကြောင့် အဒေါ်များရှိရာ မုံရွာကျောင်းကို ပြောင်းခဲ့ရခြင်းဖြစ်သည်။
ကံဆိုးတာလား ကံကောင်းတာလား ခုတော့ တသက်လုံး မခံစားခဲ့ဖူးသည့် အချစ်ဆိုသော ခံစားချက်သည် ကျမရင်ကို နွေးထွေးလာစေခဲ့ပါသည်။နွေးထွေးမှုနဲ့အတူ ၀မ်းနည်းကြေကွဲရမှုတို့သည် နှလုံးသားကို တပြိုင်နက်ထဲ လောင်ကျွမ်းစေပါသည်။
အချစ်သည် မမျှော်လင့်နိုင်တဲ့ အချိန်တစ်ခုမှာပဲ ကျမမသိအောင် ကျမနှလုံးသားထဲကို ၀င်ရောက်နေခဲ့ပါသည်။ အဲဒီအတွက် ကျမမှားတယ်လို့မယူဆချင်ပါ။မဖြစ်နိုင်ဘူးဆိုတဲ့ အတွေးတစ်ခုဟာ အတွေးတွေကို နှိတ်စက်နေလေသည်။အင်း ငါဘယ်လို ဆုံးဖြတ်ရမလဲ။အဝေးဆီမှ နာရီသံချောင်းခေါက်သံ ၃ ချက်တိတိ ကြားလိုက်ရသည်။တော်တော်တောင် ညနက်နေပြီပဲ။ညသည် ၀မ်းနည်းကြေကွဲစရာ ကောင်းလွန်းနေသည်။
“မဖြစ်သေးဘူး”
မနက်ကျရင် စာသင်ခန်းထဲမှာ အိပ်ငိုက်နေမှာ စိုးရသည်။ဘယ်လ်ိုပဲဖြစ်ဖြစ် ကြိုးစားပြီး အိပ်ပျော်အောင် ကြိုးစားရမည်။ ပြတင်းပေါက်မှ ခန်းစည်းစလေးကို ဆွဲချပြီး အိပ်ယာပေါ်တက်ကာ လှဲအိပ်လိုက်သည်။အတွေးတို့က ဟိုတစ်စ သည်တစ်စ.။ကိုရယ် မဖြစ်နိုင်တဲ့ ဇာတ်လမ်းတစ်ပုဒ်အတွက် ကျမတို့နှစ်ယောက် ခတ်စိမ်းစိမ်းပဲ နေလိုက်ကြတာ ကောင်းမယ်ထင်တယ်။ဒီထက်ပိုပြီး သံယောဇဉ်တွေ ဖြစ်မိရင် ပိုပြီးခံစားရလိမ့်မယ်လေ။
ခွင့်လွှတ်ပါ ကိုရယ် ကျမလေ ကိုမသိအောင်ပဲ တိတ်တိတ်လေး ချစ်သွားပါ့မယ်။
အလူးလူးအလိမ့်လိမ့် သူမ မဆုံးနိုင်တဲ့ အိပ်မက်တွေဆီ ရောက်ရှိသွားလေသည်။
၁၁
ကြယ်တွေ
ရုတ်တရက်
သေဆုံးသွားရတဲ့
ည တညပါ...
ကောင်းကင် ပျောက်ရှသွားမှာ
ကြောက်လို့
တိတ်တဆိတ်
ငိုကြွေးနေတဲ့
လမင်းရဲ့
ရှိုက်သံသဲ့သဲ့ကို
ငါကြားတယ်...
အပြာရောင်
မှိန်ပျပျ လင်းနေတဲ့
ငါ့ရဲ့
အခန်းကျဉ်းလေးက
ငါ့ကို
ထွေးပွေ့ထားတယ်..
ဟောဒီ..အခန်းထဲမှာ...
မင်း စွန့်ပစ်လိုက်လို့
နာကြင်နေတဲ့
ကဗျာတပုဒ်...
မင်းကို..လွမ်းလို့..
တုန်ခါနေတဲ့
သံစဉ်တခု...
ဖတ်လက်စ
စာအုပ်တအုပ်...
စားလက်စ
ထမင်းပန်းကန်တချပ်
ရေးလက်စ
သီချင်း တပိုင်းတစ
ဖရိုဖရဲ
အိပ်မောကျနေတဲ့
ဂစ်တာအိုလေး...
ကျိုးကြေသွားတဲ့
မျှော်လင့်ချက်
အပိုင်းအစတွေနဲ့
လေပြေက
အံထုတ်လိုက်တဲ့
ပန်းတပွင့်ရဲ့
ခတ်အက်အက် ရနံ့....
ပြီးတော့...
အမှတ်တမဲ့များ...
အမှတ်တရများ...
ဒဏ်ရာများ...
မင်းနဲ့ငါကြား
ကမ္ဘာကြီး
ထက်ခြမ်း ကွဲသွားသလိုမျိုး
အရာရာဟာ
ဝေးကွာဖို့
အဆင်သင့်ဖြစ်နေကြရဲ့...
နေမြင့်လေလေ
အရူးရင့်လေလေ
အချစ်ရေ
ငါ့မျက်လုံးတွေ
တဖြည်းဖြည်း
ေ၀၀ါးလာတယ်...
ဒါပေမယ့်
မျက်ဝန်းတွေရဲ့
`အဖွင်´့`အပိတ်´မှာ
မင်း...ပုံရိပ်တွေ....
မင်း...သဏ္ဌာန်တွေ...
မင်း...အပြုံးတွေ....
...ငါ.....
မုန်းရမှာတဲ့ လား....
မေ့ရမှာတဲ့ လား...
မတွေ့ခဲ့ကြရင်
အကောင်းဆုံးတဲ့ လား...
အိပ်ပျော်ဖို့
ကြိုးစားရင်း
မိုးလင်းသွားရဦးမယ့်
နောက် လာမယ့်
ငါ့ရဲ့...အထီးကျန်ညများ...
...ဒါတွေဟာ...
...ဒါတွေဟာ...
ချစ်တတ်သူ
တယောက်အတွက်
ချစ်သူပေးခဲ့သော
ဆုလဒ်များ အဖြစ်
ငါ့နှလုံးသားတွေထဲ
အမြဲထစ်ချုန်းနေမှာပါ..
အချစ်ရယ်....
`ဂူဂဲ ထတော့လေကွာ ကျောင်းသွားရအောင်´
ဂူဂဲက တခေါခေါနဲ့ ကောင်းစွာအိပ်မောကြနေဆဲပါပဲ။
`ဟေ့ကောင် ထတော့ကွ ရှစ်နာရီထိုးတော့မယ်´
သူ့ကိုပေါ်မှာ ခြုံထားတဲ့စောင်ကို အတင်းဆွဲချရသည်။ဒီလိုမှ မလုပ်ရင် ဘယ်လိုမှထမယ့် ကောင်မဟုတ်ပါ။
`ဟာ ဒေါင်းကြီးဘယ်လို လုပ်တာလည်းကွာ ဒီမှာ အတင်း အိပ်လို့ကောင်းနေတာကွ´
`သူများသားသမီးကို တော်တော် စည်းစိမ်ဖျက်ချင်တဲ့ ကောင်ပဲ´
`နေ့တိုင်းအိပ်နေရတာပဲကွာ လူ့ဘ၀ဆိုတာ တိုတိုလေး။ မင်းရဲ့ တန်ဖိုးရှိတဲ့ အချိန်တွေကို အိပ်စက်ခြင်းနဲ့ပဲ ဖြုန်းတီးပစ်မလို့လား ငတုန်းရ´
`စကားကြီးစကားကျယ်တွေကွာ တော်ပါတော့ ပြော မင်းက ဘာတွေအရေးကြီးနေတာလဲ´
`ဒီနေ့ငါ အတန်းမတက်တော့ဘူးကွာ မင်းဘာသာ တစ်ယောက်တည်းပဲ သွားတော့။မနေ့ညက မန်ယူပွဲကလည်း ရှုံးသေး အိပ်ရေးကလည်းပျက်သေး။ငါ့ဒေါသတွေ မင်းအပေါ် စုပုံသွားမယ်နော်´
ဂူဂဲ အိပ်ရေးမ၀ဘဲ ထလိုက်ရလို့ ဘုတောနေသည်။
`လိုက်ခဲ့ပါကွာ ငါတစ်ကောင်တည်း ကျောင်းသွားရမှာ ယောင်ချာချာကြီးမို့ပါ´
`မလိုက်ဘူးဆို မလိုက်ဘူးကွာ´
`ဒီမှာ ဂူဂဲ မင်းကျောင်းသားမဟုတ်ဘူးလား။မိဘက ငွေကုန်ကြေးကျခံပြီး ကျောင်းထားပေးရတာ။
မင်းကျောင်းမှန်မှန်တော့ တက်သင့်ပါတယ်။”
“လောကမှာ ငွေဆိုတာ သုံးဖြုန်းပစ်လိုက်ဖို့သာ လွယ်တာ။
ရှာဖို့က တော်တော်ခက်တယ်ကွ မင်းသိလား´
`ကဲ ထပြီဟေ့ ဘယ့်နှယ်ကွာ နားကိုညီးနေတာပဲ၊ဒီမှာ မင်းထက်သိလွန်းတတ်လွန်းလို့လေ အံကို တိုနေပြီသိလား။´
`ဒီလိုလုပ်စမ်းပါ ဂူဂဲရ´
`မေမေရေ သားမှာလေ ဟောဒီသူငယ်ချင်း အကောင်းစားကြီးနဲ့နေရတာ အိပ်ကောင်းခြင်း မအိပ်ရ စားကောင်းခြင်းမစားပါလားဗျ၊ ဒါနဲ့ ရေခ်ျိုးကန်ထဲမှာ ရေရှိသေးလား´
`အေးရှိသေးတယ် မြန်မြန်ချိုးကွာ အတန်းမမီဘဲ နေဦးမယ်´
`ဟုတ်ကဲ့ အဘ´
“ကို အောင်ဇော်ထွေး ရေကျန်သေးလားဗျ”
“ကျန်ပါ့ဗျာ မင်း နှစ်ခါ တောင် ပြန်ချိုးလို့ရတယ်။ မင်းက ဒီတခါ အစောကြီး နိုးလို့ပါလားကွ”
“ဟိုကောင် ဒေါင်းကြီး နှိပ်စက်လို့ပါဗျာ”
“ဟဟ မင်းတို့နှစ်ယောက်က မတဲ့အတူနေ မမြင်ချောင်းကြည့်”
“ဟာ ကိုဂူဂဲ ရေချိုးတော့မှာလား ကျနော်လဲ အတူချိုးမယ်ဗျို့”
“လာပါ မောင်တောက်ရာ ရေတွင်း ငါပိုင်တာမဟုတ်ဘူး”
“ဟဟ ကိုဂူဂဲကတော့ လုပ်ပြီ”
“ညကျ ဂစ်တာတီး သွားရင် ကျနော့် ခေါ်ဦးနော်”
“စိတ်ချပါကွာ စာတော့ ကြည့်နော် မင်းတို့ စာမေးပွဲကျရင် ငါဖျက်ဆီးတယ်ဖြစ်နေဦးမယ်”
“ဟုတ်ကဲ့ပါဗျ ကိုဂူဂဲတို့လို ဘီတက်ပါအောင် လုပ်မှာပါ”
`ဟေး ချမ်းချမ်းလှပြီ အေး အေးလှပြီ စကားလေးတစ်ခွန်းတော့ မေးလိုက်ချင်သည် ခင့်နာမည်....ဗွမ်း..ဗွမ်း..´
ဂူဂဲက ဒီလိုပဲ ရေချိုးရင်း အသံအာပြဲနဲ့ သီချင်းအော်ဆိုတတ်တဲ့ အကျင့်ရှိပါသည်။
`ဒေါင်းကြီးရေ ငါ့ကို ရေလည်းပုဆိုးလေး မ,စပါဦး ငါမေ့သွားလို့´
`မင်းဘယ်တုန်းကများ သတိရလို့တုန်း၊ရေချိုးတိုင်း ဆပ်ပြာ၊တဘက်၊ရေလဲ ဘာမှမပါဘူး ပြီးရင် သူများဆပ်ပြာ ယူသုံးမယ် ငါ့ကိုလှမ်းအော်မယ် ဒါပဲ၊မင်းကိုငါ အဲဒါတွေ မကြိုက်တာ။စည်းကမ်းရှိရှိနေစမ်းပါကွာ။ အလကားနေရင်း သူများအပြောမခံစမ်းပါနဲ့´
`အေးပါကွာ၊ ဒါနဲ့ မင်း ငါ့ကို မနက်ကတည်းက ထိုင်ဆော်နေပါလားကွဟေ ဘာသဘောလဲ၊ငါလည်း
မင်းရည်းစား ကြာမခိုရပါလားကွ´
`ဘာမှမဟုတ်ဘူး မင်းရဲ့ ကို့ယို့ကားယားအပေါက်တွေကို ကြည့်မရတာ ကြာနေပြီ ၊ခုဟာက ပြောလက်စနဲ့မို့တစ်ခါထဲ လုံးပြောလိုက်တာ”
“ ဒါတွေထားလိုက်ပါကွာ ခုယူနီဖောင်းမြန်မြန်လဲလိုက် ရွှေယမင်းမှာ စမူဆာသုတ် တစ်ပွဲလောက် ၀င်ဆွဲရအောင်´
“ဟေး ဒေါင်းကြီး အသည်းကွဲနေတာဆို ၊ အကိုကြီးတို့လည်း လုံးကွဲကြမယ်ကွာ ဟဟား”
“ကိုကျော်ထင်ကြီးကတော့ နောက်ပြီ”
သူတို့အဆာင်လေးက ပျော်စရာကောင်းသည်။ မေဂျာစုံ နှစ်အစုံ လူစုံသည်။ တယောက်နဲ့တယောက် ညီအကိုတွေလို နေကြသည်။
`အေး ငါလည်းဗိုက်ဆာနေပြီ၊စကားမစပ် မင်းမျက်လုံးတွေ ရဲနေပါလား၊ဘာလည်း ညက မအိပ်ဘူးလား´
`အေးကွာ ငါလည်း ဆန်နီ့အကြောင်းတွေးပြီး ညညအိပ်မရတာတွေ တော်တော်များနေပြီ၊ အရမ်းခံစားရတယ်ကွာ´
`အဲ အဲဒီမှာ စတွေ့တာပဲ´
`တကယ်ပါ သူငါ့ကို ခုထ်ိကို အတွေ့မခံသေးဘူးကွာ၊သဲမွန်တို့အဖွဲ့ ၀ိုင်းပြောပေးတာလည်း မရဘူး..”
“ငါလည်း စိတ်ညစ်ပါတယ်ကွာ၊ မင်းတို့စိတ်မကောင်းဖြစ်မှာစိုးလို့ ငါဘာသာ တစ်ယောက်ထဲ ခံစားနေတာ´
`အေးကွာ အဲဒီကလေးမကလည်း ဒီလောက်ဆို စိတ်ပြေသင့်ပါပြီ၊ တောင်းပန်တဲ့သူကလည်း တောင်းပန်နေတာပဲမဟုတ်လား´
`ထားလိုက်ပါတော့ကွာ´
ပြောရင်းဆိုရင်း လက်ဖက်ရည်ဆိုင်ရှေ့ရောက်မှန်းမသိ ရောက်လာကြသည်။ကြီးပေါတို့အဖွဲ့ကတော့ ရောက်နှင့်နြေဲကသည်။
`ဟိုနှစ်ကောင် မင်းတို့စားကြဦးမှာ မို့လား ငါတို့သွားနှင့်မယ်´ ကြီးပေါက လှမ်းပြောသည်။
`အေးကြီးပေါ ငါတို့နှစ်ကောင် ဆွဲခဲ့လိုက်ဦးမယ်´
`ဂူဂဲ ဒီနေ့ ကျူတိုရီယယ်ရှိတယ် မဟုတ်လား´
`အေးဟုတ်တယ် ပါဝါအီလက်ထရွန်းနစ်လေ နောက်ဆုံးအပတ်ပဲ ဒီတစ်ခါဖြေပြီးရင်ပြီးပြီ´
`အကိုတို့နှစ်ယောက် ဘာစားကြမှာလည်းဗျ´
`စမူဆာသုတ်တစ်ပွဲ၊ထမင်းသုတ် နှစ်ပွဲ၊ကျဆိမ့် နှစ်ခွက် ပြီးတော့ နေခြည်ဆေးပေါ့လိပ် တစ်ပွဲချကွာ´
ဂူဂဲမှာနေတုန်း ကျနော်က ဓာတ်ဘူးထဲမှ ရေနွေးနှစ်ပန်းကန် ငှဲ့ထည့်ပေးလိုက်သည်။
`၀ါး လက်ဖက်ခြောက်နံ့လေးကို သင်းနေတာပဲ ဂူဂဲ သူငယ်ချင်း ရေနွေးအရင်သောက်ကွာ ကောင်းတယ်´
လက်ဖက်ခြောက်ရနံ့လေးသင်းနေသည့် ရေနွေးပူပူ တစ်ပန်းကန်သည် ကျနော့်ဝမ်းခေါင်းထဲသို့ အကာအကွယ်မဲ့ စီးဆင်းသွားသည်။ရင်ထဲ နွေးထွေးလန်းဆန်းသွားသလိုပါပဲ။မြန်မာ့ရိုးရာ ရေနွေးကြမ်းကိုတော့ ကျနော် အရမ်းနှစ်သက်ပါသည်။
`ဘယ့်နှယ်လဲ ဂူဂဲ ရေနွေးကြမ်းက ဒီနေ့တော်တော်ဂွတ်တယ် မဟုတ်လား၊ကိုးကန့်လက်ဖက်ခြောက်တွေ သုံးထားတယ်ကွ ဧကန္တ မင်းယောက္ခမကြီး နှစ်လုံးထီများ ပေါက်ထားသလားမသိဘူး´
`ကြားသွားလို့ ပြေးပေါက်မှားနေပါဦးမယ် ဒေါင်းကြီးရာ´
စားပွဲထိုးလေးလာချသော စမူစာသုတ်နဲ့ ထမင်းသုတ်ပူပူလေးကို နှစ်ယောက်သား အားပါးတရ စားပစ်လိုက်ကြသည်။တမနက်ခင်းလုံး ခုန်ပေါက်နေခဲ့တဲ့ အစာအိမ်လည်း ခုမှပဲ ကျေနပ်စွာ ငြိမ်သက်သွားပါတော့သည်။
ကျဆိမ့်လေးသောက်ရင်း ဆေးပေါ့လိပ်ကိုယ်စီနဲ့ ဇိမ်ယူလိုက်ကြသေးသည်။
`သွားကြမယ်လေ´
`လစ်ကြတာပေါ့၊ ဟာ ဟေ့ကောင် ဒေါင်းကြီး ရှေ့မှာ ဆန်နီမို့လား´
`အင်းဟုတ်တယ်´
`တစ်ယောက်တည်း လမ်းလျှောက်လာတာကွ မင်းတော့ ဂွင်ပဲ´
`ဒီတခါတော့ ကျေနပ်အောင်ကို တောင်းပန်မယ်ကွာ မင်းနောက်က ဖြေးဖြေးလိုက်ခဲ့တော့´
ဂူဂဲကို ထားခဲ့ပြီး သူမဆီ လျှင်မြန်သော ခြေလှမ်းများဖြင့် လိုက်သွားမိသည်။
`ဆန်နီ..ဆန်နီ...နေပါဦး တို့ စကားနည်းနည်းလောက်ပြောချင်လို့´
မကြားတာလည်း မကြားချင်ယောင်ပဲဆောင်နေသလားမသိ သူမကတော့ တချက်လေးမှ ငဲ့မကြည့်ပေ။
`ဆန်နီ တကယ်ခဏလေးပါ အဲဒီလို မလုပ်ပါနဲ့ လူတွေ့ရှေ့ ကြည့်မကောင်းပါဘူး။ဒီတစ်ခါပဲ နောက်ဆုံးအခွင့်အရေးအနေနဲ့ တို့ကို တောင်းပန်ခွင့်ပေးပါ´
သူမ လှပသော ခြေလှမ်းတွေကို တုံ့ခနဲရပ်လိုက်သည်။ထို့နောက် နဖူးပေါ် ၀ဲဖြာကျနေသော ဆန်နွယ်စတွေကို ယမ်းခါရင်း ကျနော့်ကို စူးစူးရဲရဲလေး မော့ကြည့်လိုက်သည်။
ချစ်သူရယ် ခုလ်ိုအနီးကပ် မြင်တွေ့ခွင့်မရတာ ဘယ်နှစ်ရက်ရှိပြီလဲ။
ချစ်စရာ ကောင်းလိုက်တာကွာ။နေမကောင်း၍များလားမသိ မျက်နှာလေးကတော့ နည်းနည်း ငြှိုိးနေသည်။
`ကိုကျော်သူ ဘာပြောမှာလဲ ပြောလေ ကျမ အတန်းတက်ရဦးမှာ´
`ဆောရီး ဘယ်ကစပြောရမလဲလို့ စဉ်းစားနေလို့ ဒီလိုလေ ဟိုတနေ့က ကိစ္စကို တို့တကယ်တောင်းပန်ပါတယ်။နောက်ဘယ်တော့မှ ဒီလို မဖြစ်စေရဘူးလို့ ကို ကတိပေးတယ်။တို့မင်းကို တောင်းပန်ဖို့ အကြိမ်ကြိမ်ကြိုးစားခဲ့ပါတယ်၊ဒါပေမယ့်..´
`ဒီကိစ္စတွေကို ထားလိုက်ပါတော့ ကိုကျော်သူ၊ကျမကလည်း ဘာမှမဖြစ်ခဲ့ဘူးလို့ သဘောထားပြီး မေ့လိုက်ပါပြီ´
`တို့က မှားခဲ့တာဆိုတော့ တောင်းပန်ရမှပေါ့´
`တောင်းပန်စရာမလိုပါဘူး၊ ကျမအားလုံးကို ခွင့်လွှတ်ပြီးသားပါ။ကျမသွားမယ်´
`နေပါဦး ဒါဆို ဟိုလေ တို့ကို အရင်တုန်းကလို ပြန်ခေါ်မှာလား´
`၀မ်းနည်းပါတယ် အဲဒီကိစ္စကတော့ မဖြစ်နိုင်တော့ပါဘူး ကျမဆုံးဖြတ်ပြီးပါပြီ၊ကျမိကိုကျော်သူ့ကို ခင်ပါတယ်၊ဒါပေမယ့် ကျမသွားပါရစေရှင်´
`အဲဒါဆို ဆန်နီ တို့ကို တကယ်စိတ်မပြေသေးလို့ပေါ့´
`ရှင်ထင်ချင်သလို ထင်နိုင်ပါတယ်´
`အဲဒီလောက်တောင်ပဲလားဗျာ ကျနော်တကယ်ဝမ်းနည်းပါတယ်၊ ကျနော့်ကိုမြင်တိုင်ိးတ်ဆင်းရဲမှာပေါ့နော်
ကျနော် ဆန်နီနဲ့ ဝေးရာကို ထွက်သွားနိုင်ဖို့ ကြိုးစားပါ့မယ်။နောက်ဆို ဆန်နီစိတ်ဆင်းရဲရမှာ မဟုတ်ပါဘူး´
`ကျမကလည်း အဲဒီအတွက် ကျေးဇူးတင်ပါတယ်´
သူမသည် ကျနော့်ရှေ့မှာ အရာအားလုံးကို လစ်လျူရှုလျှက် ညင်သာစွာ ထွက်ခွာသည်။ကျနော့်ရင်ထဲမှာတော့ တောင်တွေပြိုနေသလို တအုန်းအုန်းခုန်လှိုက်ကျန်နေခဲ့ပါသည်။ကမ္ဘာကြီး ရုတ်တရက် အေးစက်သွားသလိုပါပဲ။
မုန်တိုင်းတိုက်ခံလိုက်ရတဲ့ သစ်ပင်တစ်ပင်လိုပဲ ကျနော် နှလုံးသားတွေ ယိမ်းထိုးကျန်ခဲ့ပါသည်။
`ဒေါင်းကြီး အဆင်မပြေဘူးလား´
`မင်း မြင်တဲ့အတိုင်းပဲကွာ´
`ပျော့ညံ့တယ်လို့မင်း ပြောလဲခံရမှာပဲ ခုငါ ၀မ်းနည်းပက်လက်ကို ငိုပစ်ချင်စိတ်ပေါက်နေတယ်´
`ငါနားလည်ပါတယ် သူငယ်ချင်းရာ´
အချစ်ဆိုသောခံစားချက်သည် ဤမျှလောက် ပြင်းထန်လိမ့်မည် ဟု ကျနော်တစ်ခါမှ ကြိုတွေးမထားခဲ့မိဘူးပါ။
`ဘယ်တတ်နိုင်မှာလဲ ဂူဂဲ ငါ့အတွက် ထိုက်တန်တဲ့ ဆုလဒ်တစ်ခုပဲ ဖြစ်မှာပါ´
`မင်းတို့ဥစ္စာကလည်း အပြက်အပြက်နဲ့ တကယ် နှခေါင်းသွေးထွက်နေပြီ´
`ဘယ်တတ်နိုင်မလဲကွာ အချစ်ဆိုတာ ဖန်တီးလို့ရတဲ့ အရာတစ်ခုမှ မဟုတ်တာပဲ၊
ငါ ကျောင်းဆက်မတက်ချင်တော့ဘူး ဂူဂဲရာ´
ဆက်ရန်
လင်းဝေ
No comments:
Post a Comment